Mae Rhwydwaith Myfyrwyr Ôl-raddedig REPAIR yn gymuned gynyddol o ymchwilwyr ôl-raddedig a gyrfa gynnar sy’n rhannu diddordeb mewn bywyd bioffilig ac atebion seiliedig ar natur. Wedi’i sefydlu drwy Brosiect REPAIR, mae’r rhwydwaith yn darparu lle i ymchwilwyr o wahanol ddisgyblaethau a sefydliadau gysylltu, rhannu syniadau a chreu gwaith ar y cyd i gefnogi dyfodol iachach, mwy gwydn a mwy cysylltiedig â natur.

Porwch drwy’r cyfeiriadur isod i ddod o hyd i ymchwilwyr, archwilio eu harbenigeddau a’u diddordebau, a nodi cyfleoedd ar gyfer cydweithredu.

Dangos pob un o'r 17 ymchwilydd 17 yn cyfateb

Tara Crank

Tara Crank

Sefydliad:

Disgyblaeth:

Rwy’n gwneud gwaith ymchwil i’r defnydd o offer digidol mewn rhaglenni lles cymunedol er mwyn hybu cysylltiad â natur yn Hwb Iechyd Gwyrdd Cynefin. Mae’n astudiaeth ymchwil gweithredol ethnograffig archwiliadol, lle rwy’n cydweithio â chymunedau lleol sy’n cyrchu cymorth lles ac arweinwyr awyr agored, i hwyluso cyrsiau sy’n integreiddio offer digidol fel camerâu bywyd gwyllt a meicroffonau arbenigol. Drwy Ddamcaniaeth Gweithgareddau, rwy’n ystyried offer digidol yn gyfryngwyr diwylliannol yn hytrach na gwrthrychau ynysig, sy’n bwysig o ran cydnabod eu dylanwad ar ein meddyliau ni, a dylanwad ein meddyliau ni arnyn nhw. Mae’r safbwynt hwn yn datgelu’r potensial sydd gan offer digidol creadigol o safbwynt rhaglenni ymatebol i natur. Mae fy ymchwil yn ymwneud â byw bioffilig, gan ei fod yn perthyn i batrwm salutogenig sy’n gweld iechyd fel rhywbeth i’w warchod a’i hyrwyddo, yn benodol drwy feithrin perthynas reolaidd â natur a chymuned. Ymhellach, mae’r ymchwil hon yn ymwneud ag atebion seiliedig ar natur, gan gynrychioli ymagwedd drawsnewidiol at iechyd sy’n ystyried adferiad lles dynol a lles y blaned fel pethau cydblethedig.

Caitlin Moffatt

Caitlin Moffatt

Sefydliad:

Disgyblaeth:

Mae Caitlin yn ymchwilydd PhD sy’n archwilio sut gall datblygiadau ynni solar gefnogi camau i fynd i’r afael â newid hinsawdd a chadwraeth bioamrywiaeth. Mae ei phrosiect, ‘Functional Biodiversity in Solar Energy Landscapes: Ecological Evidence to Support Nature-Positive Planning’, yn canolbwyntio ar sut mae parciau solar yn dylanwadu ar gymunedau o rywogaethau a phrosesau ecolegol o fewn tirweddau anthropogenig. Drwy archwilio effeithiau heterogenedd cynefinoedd, rheoli tir a chyd-destun tirwedd, mae hi’n ceisio deall sut gall seilwaith ynni adnewyddadwy gyfrannu at wrthdroi dirywiad bioamrywiaeth. Mae ei gwaith yn cysylltu tystiolaeth ecolegol leol â chynllunio ar raddfa tirwedd, gan ddarparu arweiniad ymarferol ar gyfer creu parciau solar sy’n darparu ynni glân a gwytnwch ecolegol.

Jiachen (James) Lu

Jiachen (James) Lu

Sefydliad:

Disgyblaeth:

Mae gwaith ymchwil doethurol Jiachen yn datblygu ac yn profi dull dan arweiniad ymarfer, wedi’i gyfryngu gan ddeallusrwydd artiffisial, ar gyfer ymholi arfordirol ar draws Bae Abertawe a Gŵyr. Drwy gerdded rheolaidd, arsylwi synhwyraidd, darlunio, dyfrlliw, ffotograffiaeth ac ysgrifennu myfyriol, mae’n archwilio sut mae cyfarfyddiadau ymgorfforedig â mannau arfordirol yn cynhyrchu gwybodaeth leoledig y mae modd ei holrhain. Mae deallusrwydd artiffisial yn cael ei defnyddio fel adnodd cyfryngu datgeledig i aildrefnu ac ailddehongli deunyddiau’r ymchwilydd ei hun, tra bod barn ddynol yn parhau wrth graidd y gwaith. Nod y prosiect yw cyfrannu dull trylwyr sy’n bosibl i’w efelychu ar gyfer artistiaid ac ymchwilwyr sy’n gweithio gyda lle, ymgorfforiad a chyfryngu technolegol, tra’n rhoi sylw i hanesion lleol, amodau amgylcheddol a bywyd bob dydd ar yr arfordir.

Luke Jefferies

Luke Jefferies

Sefydliad:

Disgyblaeth:

Rwy’n seicolegydd ac yn Gyfarwyddwr cwrs MSc Seicoleg Glinigol ac Iechyd Meddwl ym Mhrifysgol Abertawe. Mae fy ymchwil yn holi sut mae’r llefydd rydyn ni’n dod ar eu traws bob dydd – o amgylcheddau dan do i erddi a mannau gwyrdd – yn dylanwadu ar iechyd a lles, a sut i harneisio’r perthnasoedd hynny i wella gofal. Gan bwyso ar gefndir mewn therapi ymddygiad gwybyddol (CBT), rwy’n archwilio potensial ecotherapi, presgripsiynu cymdeithasol ac ymyriadau seiliedig ar natur, gan gynnwys fy ngwaith ymchwil cyfredol ym maes addysg nyrsio. Wrth wraidd fy ngwaith mae ymrwymiad i gau’r bwlch rhwng ymchwil ac ymarfer, gan sicrhau bod tystiolaeth yn llywio addysgu ac yn grymuso’r genhedlaeth nesaf o weithwyr gofal iechyd proffesiynol.

Kate Sandars

Kate Sandars

Sefydliad:

Disgyblaeth:

Mae angen newid seicolegol ac ymddygiadol yn wyneb yr argyfwng hinsawdd ac ecolegol. Mae gan y proffesiynau seicolegol rôl sylweddol i’w chwarae. Mae hyfforddwyr mewn sefyllfa unigryw i ddylanwadu ar ymatebion drwy eu gwaith gydag arweinwyr, y bobl sy’n gwneud penderfyniadau a phobl ag adnoddau. Mae cyrff hyfforddi proffesiynol wedi cyhoeddi datganiadau lefel uchel, ond prin yw’r ymgysylltu o du hyfforddwyr o hyd, ac mae pegynu barn yn digwydd oherwydd y traddodiad mai agenda’r cleient sy’n arwain. Mae fy ngwaith ymchwil yn archwilio sut mae pynciau hinsawdd yn cael eu trafod ym maes hyfforddi ac yn archwilio’r ffactorau seicolegol a strwythurol sy’n hwyluso neu’n llesteirio’r sgyrsiau hyn.

Yanzhu Ding

Yanzhu Ding

Sefydliad:

Disgyblaeth:

Mae fy ngwaith ymchwil yn archwilio sut mae ysgol addysg arbennig sy’n cael ei hariannu’n gyhoeddus yn Zhuhai, Tsieina, yn llywio’r gwaith o weithredu polisïau addysg cynhwysol ar draws ei phoblogaeth amrywiol o fyfyrwyr, gan gynnwys myfyrwyr ag amhariad ar eu golwg, awtistiaeth, anableddau deallusol a pharlys yr ymennydd. Gan ddefnyddio dyluniad astudiaeth achos ansoddol wedi’i lywio gan theori systemau ecolegol Bronfenbrenner, rwy’n ymchwilio i sut mae’r ysgol yn dyrannu adnoddau ar draws mathau o anabledd, sut mae partneriaethau ysgol a theulu yn amrywio yn ôl cymhlethdod yr anabledd, a pha rwystrau a hwyluswyr sy’n dylanwadu ar drosi polisi yn ymarfer yn yr ystafell ddosbarth. Nod y gwaith ymchwil hwn yw cynhyrchu mewnwelediadau gweithredadwy ar gyfer arweinwyr ysgolion a llunwyr polisi sy’n gweithio mewn cyd-destunau trefol tebyg.

Pranjal Jain

Pranjal Jain

Sefydliad:

Disgyblaeth:

Rwy’n ymchwilydd PhD ym Mhrifysgol Abertawe, yn astudio sut mae pobl yn nodi diffygion ac yn atgyweirio dyfeisiau electronig mewn caffis trwsio cymunedol. Mae fy ymchwil yn canolbwyntio ar y wybodaeth ymhlyg y mae atgyweiriwyr yn ei datblygu drwy brofiad ac yn ei rhannu drwy sgwrs, ystum, defnydd o offer a chydweithio. Gan bwyso ar Ryngweithio Dynol-Cyfrifiadurol, dylunio a Gwaith Cydweithredol gyda Chymorth Cyfrifiadur, rwy’n archwilio sut gall offer digidol ac offer sy’n cael eu hategu gan ddealltwriaeth artiffisial helpu i gipio a rhannu gwybodaeth atgyweirio heb ddisodli barn ddynol. Nod yr ymchwil yw cefnogi dysgu atgyweirio cynhwysol, atgyfnerthu cymunedau atgyweirio lleol a lleihau gwastraff electronig drwy arferion cynaliadwy a chylchredol. Mae fy ymchwil yn edrych ar sut y gall adnoddau digidol gefnogi atgyweirio cymunedol, pan fo gwirfoddolwyr yn helpu pobl i drwsio nwyddau trydanol domestig yn hytrach na phrynu rhai newydd yn eu lle. Mae hyn yn cysylltu â byw bioffilig oherwydd bod cymunedau atgyweirio yn meithrin y math o gydweithredu lleol a gofal am adnoddau sydd hefyd yn cefnogi perthnasoedd iachach rhwng pobl a’r amgylchedd naturiol, gan ganolbwyntio ar wytnwch cymunedol a gofal ecolegol.

Jasmine Dale

Jasmine Dale

Sefydliad:

Disgyblaeth:

Mae fy ymchwil PhD yn edrych ar dirlun diwylliannol-ecolegol Cymru a sut i feithrin ffyrdd tylwyth-ganolog o wybod a bod. Wedi’u gwreiddio mewn amrywiol ddulliau o gyfranogi – o ddysgu a gwaith tir i’r celfyddydau, polisi a llywodraethu – mae fy ngwaith maes yn olrhain amodau sy’n meithrin y syniad o ecosystemau fel rhwydwaith deallus a dynamig o berthnasoedd, gyda bodau dynol yn rhan annatod ohonyn nhw. Fel hwylusydd paramaethu, mae’r gwaith wedi’i leoli i ‘beillio’ atebion ymarferol: drwy broses ysbrydoledig a chreadigol, dylunio systemau bwyd a bywyd gwyllt, a hyfforddi Gwarcheidwaid Natur o gymunedau lleol i’r Senedd. Mae fy ymchwil a’m gwaith llawrydd yn pwyso ar feddylfryd ecosystemau ac yn archwilio ffyrdd o newid ein byd-olwg i ddatblygu a chyd-ddylunio gyda phrosesau naturiol a rhywogaethau eraill. Mae hyn yn cael ei roi ar waith mewn amrywiaeth o leoliadau a chyd-destunau, gan gynnwys dylunio ar gyfer systemau bwyd lleol gwydn a ffyniannus, bioamrywiaeth cynefinoedd, lles dynol, llywodraethu, dŵr a’r amgylchedd adeiledig.

Zafar Khallyev

Zafar Khallyev

Sefydliad:

Disgyblaeth:

Mae fy ngwaith ymchwil doethurol yn archwilio’r ffordd y mae’r cyfryngau newyddion yn y DU a’r Unol Daleithiau yn llunio’r drafodaeth am natur frys mynd i’r afael â newid hinsawdd. Rwy’n canolbwyntio ar y newid terminolegol o dermau niwtral fel “newid hinsawdd” i dermau brys megis “argyfwng hinsawdd”. Wrth gymharu’r gwahanol gyfryngau (prif ffrwd ac amgen) a chyfeiriadedd gwleidyddol, rwy’n dadansoddi sut mae gwahanol gyfranwyr yn fframio ac yn cyfathrebu natur y brys dros amser. Drwy integreiddio ymchwil cyfathrebu hinsawdd, astudiaethau cyfryngau amgen a dulliau economi wleidyddol, mae’r astudiaeth hon yn darparu adroddiad cynhwysfawr am y ffordd y mae systemau cyfryngol yn dylanwadu ar y dehongliad a geir o argyfwng amgylcheddol ar draws dau gyd-destun cyfryngol gwahanol. Mae fy ymchwil ar yr argyfwng hinsawdd yn y cyfryngau yn canolbwyntio ar sut rydyn ni’n cyfathrebu risg amgylcheddol, sy’n hanfodol o safbwynt denu cefnogaeth y cyhoedd i atebion seiliedig ar natur. Wrth symud ymlaen, mae gen i ddiddordeb mawr mewn archwilio sut y gall fframio y cyfryngau helpu i normaleiddio byw bioffilig ac annog atebion seiliedig ar natur i gael eu mabwysiadu mewn cymunedau trefol.

Jaclyn Martin

Jaclyn Martin

Sefydliad:

Disgyblaeth:

Mae fy ymchwil yn canolbwyntio ar ffuglen hinsawdd, is-gategori o’r genre ffuglen wyddonol, o ddyddiau cynnar ymgyrchu ynghylch yr hinsawdd yng nghanol yr ugeinfed ganrif hyd heddiw. Byddaf yn ymgymryd â dadansoddiad beirniadol o’r gweledigaethau ‘ecotopaidd’ hyn, gan ddefnyddio fframwaith Ôl-ddyneiddiol a Materoliaeth Newydd Ffeministaidd, i ganfod sut gall y testunau hyn lywio ein dyfodol dychmygol ni ein hunain. Byddaf yn canolbwyntio’n arbennig ar gyflwyno cymunedau heb hierarchaeth sy’n seiliedig ar ofal yn hytrach na rheolaeth, a dulliau o ymarfer a chynhyrchu gwybodaeth teg a chynaliadwy.

Nikolay Kostov

Nikolay Kostov

Sefydliad:

Disgyblaeth:

Mae fy niddordebau ymchwil yn canolbwyntio ar fabwysiadu ac effaith Deallusrwydd Artiffisial (AI) mewn addysg uwch, gyda sylw arbennig i sut mae’r dechnoleg yn trawsnewid addysgu, dysgu, arweinyddiaeth ac arferion sefydliadol. Fel myfyriwr Doethuriaeth mewn Gweinyddiaeth Busnes yn y Drindod Dewi Sant, mae gen i ddiddordeb mewn archwilio’r cyfleoedd a’r heriau sy’n gysylltiedig â mabwysiadu AI, gan gynnwys parodrwydd sefydliadol, arweinyddiaeth, trawsnewid digidol a gweithredu cyfrifol. Nod fy ymchwil yw archwilio sut gall sefydliadau addysg uwch integreiddio technolegau AI yn effeithiol gan ar yr un pryd gefnogi arloesi, gwella arferion addysgol ac ymateb i anghenion newidiol myfyrwyr, addysgwyr a sefydliadau.

Hal Szary

Hal Szary

Sefydliad:

Disgyblaeth:

Mae mwy na 50% o dir dan goed yn y DU yn blanhigfeydd – mae arsylwadau diweddar mewn planhigfeydd conwydd egsotig yn awgrymu y gallai prosesau olynol naturiol fod yn trawsnewid y tirweddau hyn yn ecosystemau newydd ailgyfunol. Mae’r prosiect hwn yn nodi ac yn disgrifio’r cymunedau planhigion hybrid sy’n dod i’r amlwg mewn coetiroedd dan reolaeth ddwys yn ardal Castell-nedd Port Talbot. Dyma’r ardal sydd â’r gyfran uchaf o dir dan goed yn y DU, y rhan fwyaf ohoni’n blanhigfeydd, sy’n golygu ei bod yn system astudiaeth ddelfrydol ar gyfer pennu’r ffactorau sy’n dylanwadu ar adfer a gwella, a llywio ymyriadau rheoli a allai wella gwytnwch coedwigoedd, bioamrywiaeth a gwasanaethau ecosystemau yng Nghymru.

Catrin Bradley

Catrin Bradley

Sefydliad:

Disgyblaeth:

Mae fy ymchwil ‘Once Upon a Place: Storytelling in the Digital Age ‘yn ystyried sut i ddefnyddio technoleg ddigidol a geoleoli i gysylltu lle a stori, gyda mynegiant creadigol cyfoes. Fel astudiaeth drawsddisgyblaethol, mae’r fframwaith damcaniaethol yn ymgorffori cysyniadau fel treftadaeth ddiwylliannol, adrodd straeon digidol, mapio dwfn, haenau naratif o le a rhyngweithio dynol-cyfrifiadurol. Mae’r fethodoleg yn cyfuno dadansoddiad o gyfweliadau, grwpiau ffocws, astudiaeth achos, ymchwil defnyddwyr a phrototeipio. Ar ôl datblygu prototeip ar gyfer platfform adrodd straeon digidol awyr agored, sy’n integreiddio Realiti Estynedig, y nod yw delweddu a chyflwyno mythau, chwedlau a chwedlau gwerin mewn safleoedd penodol a datblygu dehongliad unigryw yn seiliedig ar le ar gyfer addysg ac adloniant.

Martyna Joanna Surma

Martyna Joanna Surma

Sefydliad:

Disgyblaeth:

Rwy’n Gynorthwyydd Ymchwil ar gyfer y prosiect REPAIR. Rwy’n gweithio gyda’r Athro Cysylltiol Blanche Cameron (Coleg Prifysgol Llundain) a’r Athro Kirsti Bohata (Prifysgol Abertawe). Mae fy ffocws ar yr heriau a’r rhwystrau o ran gweithredu Datrysiadau Seiliedig ar Natur mewn stadau tai cymdeithasol, gan ddefnyddio’r Biome fel astudiaeth achos ôl-osod dwfn. Mae gen i ddiddordeb arbennig yn yr agweddau ar ôl-osod ynghlwm wrth foderneiddio’r stoc dai bresennol fel ymateb i bwysau cynyddol newid hinsawdd yn y Deyrnas Unedig a thu hwnt. Rwy’n ymchwilio i’r ffactorau amgylcheddol, economaidd a chymdeithasol sy’n sbarduno’r trawsnewid ehangach i eiddo tiriog cynaliadwy, gan gynnwys ymagweddau arloesol at gyllid eiddo tiriog. Mae fy ymchwil yn edrych ar y potensial ar gyfer ôl-osod ardaloedd trefol gan ddefnyddio datrysiadau seiliedig ar Natur. Bydd y dull hwn yn hwyluso’r trawsnewid i amgylcheddau mwy gwydn o ran yr hinsawdd ac yn hybu cyfleoedd dinasyddion ar gyfer byw bioffilig. Oes gennych chi ddiddordeb mewn ymuno â Rhwydwaith Myfyrwyr Ôl-raddedig REPAIR? Os ydych chi’n ymchwilydd ôl-raddedig sydd â diddordeb mewn bywyd bioffilig, atebion seiliedig ar natur neu feysydd ymchwil cysylltiedig, fe fydden ni wrth ein bodd yn clywed gennych chi. I gael gwybod mwy neu i ymuno â’r rhwydwaith, cysylltwch â repair@swansea.ac.uk

Jieying Liang

Jieying Liang

Sefydliad:

Disgyblaeth:

Mae fy ymchwil yn archwilio sut mae mannau creadigol yn cael eu ffurfio, eu trefnu, eu rheoli a'u datblygu drwy lens estheteg berthynol. Rwy'n archwilio sut gall y syniadau hyn lywio arferion a datblygiad bob dydd mannau creadigol. Gan dynnu ar waith maes yn y DU, rwy'n datblygu iaith batrwm berthynol a gyflwynir, ar ffurf cardiau ar draws deuddeg dimensiwn, gan gwmpasu nodweddion gofodol, ffurfiau sefydliadol, arferion gweithredol ac amodau ar gyfer datblygu. Trwy weithdai cyfranogol yn Guangzhou, Tsieina, rwy'n archwilio sut y gellir cwestiynu, addasu a defnyddio'r patrymau hyn fel pecyn cymorth ymarferol ar gyfer cyd-greu mannau creadigol a phrosiectau artistig ystyrlon yn lleol.

Megan Cumming

Megan Cumming

Sefydliad:

Disgyblaeth:

I am a postdoctoral researcher in Psychology at Swansea University, working on Project REPAIR. My PhD research explored how physical environments can facilitate flow experience, a state of deep immersion and absorption in enjoyable activities. Through Project REPAIR, I am exploring how, why, for whom, and under what circumstances biophilic living can contribute to sustainable wellbeing. Drawing on my background in architectural design and floristry, I am interested in using creative arts as both a research method and a means of reconnecting people with nature.

Afonso Andrade Monteiro Pereira

Afonso Andrade Monteiro Pereira

Sefydliad:

Disgyblaeth:

Rwy’n ymchwilydd PhD mewn Seicoleg ym Mhrifysgol Abertawe yn gweithio ar Brosiect REPAIR. Mae fy ymchwil yn canolbwyntio ar effeithiolrwydd ymyriadau seiliedig ar natur wrth feithrin lles holistaidd. Mae gen i ddiddordeb hefyd mewn emosiynau sy’n gysylltiedig â’r hinsawdd a sut y gellir defnyddio pryder am newid hinsawdd fel ysgogiad ar gyfer ymddygiadau cynaliadwy ac a yw hynny’n cynyddu gobaith o ran yr hinsawdd. Ar y cyd â’r Grŵp Ymchwil Lles Cynaliadwy, rydyn ni’n ymchwilio i newidiadau dros amser yn lles preswylwyr y BIOME, cysylltiad â natur ac ymddygiadau sy’n cefnogi’r amgylchedd.

Oes gennych chi ddiddordeb mewn ymuno â Rhwydwaith Myfyrwyr Ôl-raddedig REPAIR? repair@swansea.ac.uk